Նիկոլին հեռացնելու ենք հաստատ, դա անելու ենք անարյուն․ Իշխան Սաղաթելյան

Նիկոլին հեռացնելու ենք հաստատ, դա անելու ենք անարյուն․ Իշխան Սաղաթելյան

«Դիմադրություն» շարժման նպատակը նույնն է՝ կանխել Արցախի հայաթափումը և Հայաստանի թրքացումը, չեզոքացնել Հայաստանի ինքնիշխանությանը սպառնացող վտանգները, իսկ դրան հասնելու համար պետք է հեռացնել այս իշխանություններին, ու քանի դեռ այս հարցերը չեն լուծվել, այս շարժումը դադար չունի այս մասին Ֆրանսիայի հրապարակում ընթացող հանրահավաքի ժամանակ հայտարարեց ԱԺ փոխնախագահ Իշխան Սաղաթելյանը։

Այնուհետև Իշխան Սաղաթելյանը թվարկեց շարժման ձեռքբերումները։

«1.Շարժման շնորհիվ հասարակությունը զարթնեց, վերջնականապես փակվեց հարցը, թե Արցախի հարցը հետաքրքրում է հանրության միայն փոքր շերտերին։

2․ միջազգային հանրությունը հասկացավ, որ այստեղ կա ժողովուրդ, որին չի կարելի ցանկացած լուծում և զիջում պարտադրել։

3. Ձևավորվեց ազգային գաղափարի շուրջ լայն համախմբում հանրային տարբեր շերտերի ու շրջանակների աջակցությամբ։ Այս հրապարակը այլևս գործոն է։ 

4. Թե՛ երկրի ներսում, թե՛ արտաքին աշխարհի համար փաստվեց, որ օրվա իշխանությունը չունի մանդատ ժողովրդի կողմից երկիրը նոր զիջումների տանելու։

5. Ամբողջությամբ կազմաքանդվեցին գործող իշխանության քաղաքական և սոցիալական հիմքերը, իշխանության միակ հենարանը ՔՊ–ի նեղ շրջանակն է և ոստիկանական բիրտ ուժը։

6. Հանրային խոսույթում վերջնականապես ձևավորվեցին այն առաջնահերթությունները, որոնք պետք է ընկած լինեն հայկական պետականությունների հիմքում։ Այդ օրակարգը ձևավորվեց այս հրապարակում քաղաքացիների շնորհիվ և այլևս դա հանրային օրակարգ է։

7. Որքան էլ վարչախումբը հետպատերազյման ժամանակաշրջանում փորձեց հանրությանը տրամադրել նոր պարտության և աշխարհին համոզել, թե հայերը հաշտվել են տեղի ունեցածի հետ, մենք այս շարժումով ապացուցեցինք հակառակը։ Մենք ասացինք՝ տեր ենք մեր երկրին, ունենք այդ կամքը, վճռականությունը և 5000-ամյա ժողովրդի ընթացքը կասեցնել հնարավոր չէ։

8. Հայ ժողովուրդը սկսեց հաղթահարել պատերազմում ջախջախիչ պարտության  հետևանքները և կրկին բարձրաձայնել իր ազգային պահանջները։

9. Գծվեց հստակ ջրբաժան։ Մեր ժողովրդի 90 տոկոսը բացահայտ հայտարարել է՝ դեմ է, որ Արցախը լինի Ադրբեջանի կազմում։ Սա սոցհարցման պաշտոնական արդյունք է։

10. Շարժումը այս պահին առնվազն կանխեց և խախտեց նոր կապիտուլյացիա ստորագրելու ժամանակացույցը, և դրանով են պայմանավորված Նիկոլի ու Ալիևի վախերը։

11. Մեր շարժումը սկսեց ոտքի հանել արցախահայությանը, ոտքի է նաև Սփյուռքը։ Հայաստան–Արցախ–Սփյուռք եռամիասնությունը վերականգնման փուլում է։

12. Քաղաքական ճգնաժամը դրսևվորված է և փաստ։ Որքան էլ փորձեն այն քողարկել, սա այլևս իրականությունը։ Իսկ Նիկոլի հեռացման հանրային պահանջը հստակ է և աներկբա»,–ասաց նա։

Իշխան Սաղաթելյանը նաև նշեց, որ հենց այս հրապարակում ձևավորվում է ազգային, պետական կորիզը։ «Այս կորիզը դառնալու է նոր որակի հայկական պետականության հիմքը, այս կորիզը դառնալու է մեր պետության իմունիտետը, որը պաշտպանելու է մեզ ամեն տեսակ վարակներից և հիվանդություններից»– ասաց նա։

Իշխան Սաղաթելյանը ասաց, որ գլխավոր խնդիրը մնում է չլուծված՝ Հայաստանը դեռ ղեկավարում է գոյաբանական վտանգ ներկայացնող մարդը։ «Մենք հեռացնելու ենք Նիկոլին, հեռացնելու ենք հաստատ, բայց դա անելու ենք անարյուն»,– ասաց նա։

ԱԺ փոխնախագահը նշեց, որ շարժմանը պլանավորած քայլերն իրականացրել են ամբողջությամբ, սակայն իշխանությունների ցինիզմը, աշխարհաքաղաքական իրավիճակը իրենց ազդեցությունն են թողել շարժման ծրագրերի վերջնարդյունքի վրա, ուստի շարժումը կանգնած է մարտավարության փոփոխության անհրաժեշտության առաջ։ «Մեզ հարկավոր է ստեղծել նոր իրավիճակին համապատասխան մարտավարություն, որը թույլ կտա ավելի ընդլայնել շարժումը և հասնել մեր վերջնական նպատակին»,– ասաց նա։

Խոսելով բացթողումների մասին՝ նա ասաց, որ Նիկոլ Փաշինյանի մերժողների թիվը շատ ավելի մեծ է, քան այս հրապարակում գտնվողներինը։ «Մենք դեռ չենք կարողացել այդ բոլոր մարդկանց փողոց դուրս բերել»,– ասաց նա՝ հավելելով, որ դեռ կան մարդիկ, որոնք կարծում են, որ սա պայքար է իշխանության համար։

Իշխան Սաղաթելյանը նաև նշեց, որ շարժումն ունեցել է կազմակերպչական բնույթի թերացումներ, որոնք ևս պետք է շտկեն առաջիկա օրերին։ 

ԱԺ փոխնախագահը նշեց, որ շարժման ներուժը մեծացնելու, աշխարհագրությունը ընդլայնելու, գործիքակազմը հարստացնելու, նոր մոտեցումներ որդեգրելու, հարթակը ընդլայնելու, հստակ գործողությունների ծրագրով պայքարը շարունակելու նոր և կարևոր հանգրվանի առջև են կանգնած, հետևաբար՝ «Դիմադրություն» շարժման ղեկավարները որոշել են վերափոխել շարժման կառուցվածքը և մարտավարությունը՝ միաժամանակ կապիտալիզացնելով արձանագրված այն բոլոր ձեռքբերումները, որ ունեցել են։

«Ուստի՝ անհրաժեշտ է ինստիտուցիոնալ բնույթ հաղորդել շարժմանը, քաղաքական կազմակերպական, քարոզչական աշխատանքները ավելի արդյունավետ դարձնելու համար։ Երկրորդ՝ շարժմանը պետք է ցանցային բնույթ հաղորդել՝ կյանքի կոչելով տարածքային և ճյուղային կառուցվածքային միավորներ»,– ասաց նա՝ բացատրելով, որ շարժումը այսուհետ ունենալու է կոմիտեներ, ոլորտային հանձնախմբեր, ինչի շնորհիվ լուծելու են քաղաքական, կազմակերպչական, քարոզչական ուղղություններով կադրային ներուժը ընդլայնելու, կարող նորանոր խմբեր, կարող անհատներ ընդգրկելով շարժումն ավելի ընդլայնելու և շարժմանը նոր ուժ տալու հարցը։

Իշխան Սաղաթելյանը նաև նշեց, որ երկու ուղղություններով պետք է իրականացնեն նախապատրաստական լուրջ աշխատանք. առաջինը՝ պաշտոնականության հիմքերի ամբողջացում՝ իրավական, քաղաքական ճանապարհով եւ երկրորդ՝ ժողովրդի կողմից վարչապետի թեկնածուի առաջադրում՝ ի բավարարումն օրենքով սահմանաված անվստահության հայտնելու նախապայմանին: «Խոսքը վերաբերում պաշտոնականության գործընթացին: Այս մասին ավելի մանրամասն դեռ կխոսենք»:

Rate this item
(0 votes)
Last modified on Երեքշաբթի, 14 Հունիսի 2022 23:24

Լրահոս

© 2022 Lurer24.com All Rights Reserved